再說一次…我愛你

　　我最愛既BB：
　　
　　你好嗎？同你已經分開左差唔多三個月喇！我諗你而家一定係一倨好遠好遠既地方睇住我。
　　
　　由我識你到同你分開個一日，前後都唔夠一個月，而你爹爹更加只係見過你三次，你仲記唔記得佢係點既樣呢？其寅我知我有左你既時候，我真係好開心，但因為我同你爹係個時已經分開左，所以無助感同失落亦都隨之而黎……我同你爹講我有左之後，佢都講左一句好唔捨得你，但我冇諗過你那個一向重視生命既爹爹竟然堅決唔俾我生你出黎，甚至我只係求佢係你公公婆婆面前講一次大話，話會負責任，只要你可以出世，佢竟然話一分鐘時間都唔會俾我，甚至最後我決定同你分開，佢都冇黎同你講最後一句野，個一刻我心碎了……
　　
　　原本我都諗住生你出黎，大不了自己養，所以我好主動同你公公婆婆講，但佢地太傳統喇！加上你既姨姨(我既親妹妹)又同時有左，所以佢地堅決唔俾我生，個一排我真係好唔開心，成日喊住同你傾計，我知你當時一定感受到。我甚至有諗過一走了之等你出左世先算，好彩你班契媽(我D好朋友)好關心我地，甚至買D大肚婆奶粉俾我飲，又計劃你出世之後既事等等。
　　
　　點知就係呢個時候我突然作小產，送入醫院既時候你其中一個契媽同我講：『你由得BB自己選擇啦！或者佢想用咁既方法離去而唔使你傷心呢！』個一刻我真係好唔開心，好怕冇左你，好彩你最後都冇事，係超聲波到我見到你雖然只係一粒豆咁細，但已經有左心跳，我知你係識諗架！
　　
　　但經過呢件事，你公公婆婆更加要我放棄你，因為你婆婆以前都試過同樣情況，結果最後係冇左個BB，終於我應承左佢。係手術室入面醫生幫我插上心跳機，我除左好清晰聽到自己心跳外，隱約間仲好似聽到你既心跳，好輕好輕，好似係到同我講byebye….
　　
　　BB，媽咪對你唔住，我知道我唔俾你生存，我冇資格要你叫我做媽咪，但我只係希望如果呢個世界係有投胎既話，搵一家係可以俾到你開心既屋企，媽咪呢一世都唔會忘記你，我唔會要求你原諒我，我只係想同你講：我愛你………
　　
　　
　　永遠愛你既媽咪
　　2005年9月15日